假如我是隱蔽青年的…系列一-我是隱青的媽媽

阿忍：

今日我同班師奶去飲茶，唔覺意聽到鄰座的茶客在討論「隱蔽青年」的特徵，從茶客口中得知「隱青」喜歡自絕於社會，不喜外出之餘，又害怕與人交談……後來講下講下，仲話這些人要立即接受社工「上門追擊」，否則有機會變成精神病云云，講到我愈來愈驚，所以我想都要同你傾下，恐防你真係隱青就弊了。
唉，你知唔知道屋企人好擔心你的，你之前完全沒有同我們商量過，就自己停學，講真，你而家都沒返學幾個月，究竟你有沒試過搵工的？你成日都話出面人工太低，連車費都要倒貼，不化算所以什麼也不幹，但係而家時勢就是咁架啦，我日日做十幾個鐘又咪係得三千幾元，莫講話你未大學畢業啦，就算已經畢業，現在都係賺五、六千元，更何況你未畢業呢，現時話就話經濟復甦，但是邊會益到我們這些低下階層呀，但係都無計啦，唔通什麼也不幹嗎？而且而家既女仔個個都好現實，你什麼都不做，唔通你想女友飛咗你咩?
唉，而家真是一代不如一代，你們班年青人可能都太受保護了，好似溫室中的小花咁，小小挫折都受不了，老闆肯付人工咪當工作經驗囉，你不要再眼角高吧，這就是現實世界，不由你話事的了，你成日自閉係房打機都唔可以解決問題架，一日打成十幾個鐘，又唔想同人傾計，唔通你想其他人話你係嗰啲好似俾人當係「計時炸彈」的「隱蔽青年」咩?
那些專家社工講那些不喜歡出街和同人傾計的人叫做「隱蔽青年」喎，我真是好擔心你係唔係呀，你成日都收埋自己係房，唔係打機就睇漫畫書，有時我都唔知你係度做咩，不如你都去見吓社工啦，可能他們可以幫你搵工呢。
阿忍，百忍成金呀，現實啲啦。

媽